Por Rafel Fleta Girón
A Diputazión de o Cheneral de o Reino d'Aragón y as suyas armas dica o sieglo XVI
Toz conoxemos lo Escudo
d'Aragón que se veye en o nuestro Estatuto d'Autonomía, con os suyos cuatro
cuartels y a suya coroneta ubierta. Yera o Escudo adempribiau por a Diputazión
de o Reino d'Aragón ta 1499, pero no eba estau siempre asinas.
As Diputazions de o
Cheneral estioron os organos político-alministrativos de que s'adotaron os
Estaus de a Corona d'Aragón por alcuerdo de Cortes Chenerals d'Aragón, Cataluña
y Valenzia, respondendo a una demanda de o Rei Pietro IV "lo de o
puñalet" pa recaudar os impuestos, as Cheneralidaz, clamadas asinas porque
toz eban de pagar-las, que amenistaba pa enfrontinar a invasión de Castiella a
metat de o sieglo XIV. Os diputaus yeran representans de os cuatre brazos de as
Cortes (Iglesia, Barons, caballers y infanzons, y Universidaz, Ziudaz, Villas y
Comunidaz) que se trigaban por insaculación, u siga, sorteyo, entre os miembros
de as Cortes.
A Diputazión de o Reino
d'Aragón se tornó un autentico guvierno, que alministraba os diners de as
Cheneralidaz, sacaus os diners que amenistaba o Rei p'as suyas guerras, ocupando
se de a desfensa de o Reino con a Guarda d'Aragón que cusiraba mugas y camins
asinas como de mantener puens, camins y ospitals. En o Sieglo XV, con Alfonso V
vivindo cuasi de contino en Naples, a Diputazión prenió gran poder y plegó en o
suyo más amplo desarrollo.
En ixos años se construyó
lo suyo Palazio, a o costau de l'arzobispau, en a Plaza de a Seu, chusto ande
agora se veye "Acción Católica", ixe guallardo palazio estió entregau
por l'Audienzia Reyal a l'obispo a prenzipios de o sieglo XIX, feba ya más de
zien años que o Borbón eba trencau os fueros nuestros, con a desincusa de que
eba estau asabelo estricallau en o Sitios y que cuasi estaba pa espaldar-se.
L'obispo lo remató de tirar y construyó lo edifizio autual, pero ixa ye atra
istoria que bel diya rezentaremos.
Lo causo ye que conoxemos
as armas viellas de a diputazión porque ue se conservan as Piedras Armeras, que
luziban en o cabezero de o devandito palazio, cusiradas en o Museu de Zaragoza.
Una replica suya se troba en a dentrada prenzipal de a siede autual de a
Diputazión d'Aragón. En o tiempo en que se fazió lo Palazio de a Diputazión,
las suyas armas no yeran que tres de os cuatro cuartels posteriors: a Cruz
d'Iñigo Arista, a Cruz d'Alcoraz, con as suyas cuatre cabezas de moros, y profes,
os cuatro palos royos.
Fernando II
Pero ya emos dito que ta
1499 i abió un cambeo en o Escudo: a Diputazión dezidió i adibir un atra arma:
l'Arbol de o Sobrarbe, y asinas se fazió lo escudo que agora toz conoxemos como
"lo istorico". Pero, a qué fin ixe cambeo?
L'Arbol de o Sobrarbe
representa os Fueros que, seguntes a viella falordia que dixó escrita Jerónimo
de Blancas, nazioron en o Sobrarbe y son l'orichen de a parola que feban os
Reis d'Aragón cuan yeran coronaus, u millor, a parola que le feba l'Arzobispo
de Zaragoza en a Seu en ripresentazión de as Cortes: "nos que somos tanto
como vos y chuntos más que vos, vos femos Rei, con tal guardez os nuestros
Fueros y Libertaz, y si no, no." Pos yera plazentero en Aragón que si bien
en Castiella, "a parola de o Rei ye Lei, en Aragón ha abiu Leis antes que
Reis", y por ixo, pensando que conforme
a o Dreito Romano, as Leis las feban os Reis, os aragoneses tenébanos
Fueros, que se feban conforme o costumbre y se escribibian en as Cortes.
Fernando II prezipiaba a
mirar de ficar o sistema castellano en Aragón, as Cortes eban refusau la suya
prebatina por imposar a "Santa Hermandad", como una mena de cuerpo de
polizía que luitaría contra os bandius, y o Reino se barruntó que en reyalidat
quereba susituir a la Guarda d'Aragón, pero as Cortes no eban puesto impedir que
a Santa Inquisizión se ficase en o Reino, y mal que pesó más tardi, ta 1591,
pero ixo también ye atra historia.
Lo feito ye que a
Diputazión de o Reino metió en o primer cuartel de lo escudo, u siga, lo
prenzipal de os cuatro, lo símbolo de que o Rei d'Aragón yera o Prenzipal
dentre toz, pero ye yera menos que toz, u siga, menos que as Cortes.
O sieglo XVII
Como sabemos toz, ta
1591, o Rey Felipe (o primero de o suyo nombre que reinaba en Aragón) mandó
decapitar a o Chustizia d'Aragón, y en as Cortes de l'año siguien, aforzadas
por o suyo exerzito, se dezidió alcorzar o poder de a Diputazión: continaría
pagando a Guarda d'Aragón, pero agora pendería d'un Guvernador nombrau por o
Rei, o Chustizia sería nombrau por o Rei, qui tamién lo podría zesar, y o Rei
podría nombrar un Virrei estranchero (u siga, castellano) si asinas lo dezidiba
(y asinas lo decidió cuasi siempre). Pero os Fueros y as insituzions continaron
con a suya faina, Diputazión, Cortes, Chustizia, Fueros y Observanzias
continaron fendo d'Aragón un rechimen parlamentario, tanimientres alredor, en
Castiella, Cataluña u Franzia, l'absolutismo adevantaba a firmes trangos.
En iste tiempo, dimpués
que le tallasen a cabeza a Lanuza, ye cuan trobamos iste escudo, de a
Diputazión de o Reino d'Aragón, prou esconoxito por os aragoneses.
De primeras, o que
trestuca ye la orden de os cuartels:
O primero: l'Arbol de o
Sobrarbe ye en o zentro de l'escudo, lo que se dize "Escusón" y
que ye lo puesto de más onor en a
Eraldica. Si miramos o Escudo Constituzional de o Reino d'España, en o Escusón
veyemos as Armas de os Borbons. Parar cuenta de que en l'Aragón de o sieglo
XVII o feito fundacional yeran os Fueros, en a España de o sieglo XXI, os
Borbons.
Dimpués se veyen os
cuatro palos royos, que en o de 1499 yera lo zaguero, parixe que ta o sieglo XV
os cuatre palos royos encara sinificaban a Casa d'Aragón, pero puestar que
baixo los Austrias, cuan a Casa Reyal d'Aragón ya no yera que un ricuerdo, os
cuatre palos tenesen ya un sinificau territorial: Aragón como Reino de a viella
Corona.
A Cruz d'Iñigo Arista,
remerando lo viello linache de os Reis d'Aragón, y a Cruz d'Alcoraz, que cutio
s'eba presentau como lo Esprito de Cruzada pero agora no se i veyen as cuatro
cabezas de moros, sino, bien visteras, dos negras y dos blancas, amostrando que
os Cronistas de o Reino feban o suyo treballo, como rezentaremos más abaxo.
Y a la fin, pa dixar bien
platero que o Reino d'Aragón yera la Cabeza de a viella Corona, lo escudo de
Sicilia, con os cuatre palos y as Alicas de os Hohenstaufen. Que igual que os
Aragón estioron ereus de a Casa Arista por Aragón, lo son de ista casa alemana
ta reinar en Sizilia.
Atra custión que truca ye
a Corona Zarrada, l'autual ye ubierta y bi ha chen que remera que a viella corona
de o Reino d'Aragón yera ubierta, pero ixo yera en tiempos en que a Eraldica no
yera encara guaire desarrollada: en o sieglo XVII yera plazentero que a Corona
zarrada u Reyal ripresentaba un dominio sobirano, tanimientres que una ubierta
u Ducal yera proprio de territorios dependiens d'un Estau más gran.
Dos moros y dos
cristianos.
Mira tu que son chicotas
as cabezas de a Cruz d'Alcoraz y mira que han de dar-se mal pa debuxar-ne dos
de negros y dos de blancos. A qué fin? No yeran cuatre cabezas de moros
cortadas?
Pues no pas.
En primeras, cal parar
cuenta de que a documentazión más viella, en o sieglo XIII, zien años dimpués
de a Batalla d'Alcoraz, charra de "cuatre cabezas coronadas", prau,
ni de moros ni cortadas, anque ye cierto que cuan Pedro III "Lo
Gran" fa servir iste siñal como propio ye en a "presunta"
Cruzada contra Túnez, presunta porque en cuenta ir ta Tunez marchó ta Sizilia y
se la furtó a os franceses, pero ixa también ye atra historia, u siga que bien
pronto sirvió ista Cruz d'Alcoraz, como ya emos dito, pa simbolizar o Esprito
de Cruzada de o Rey de Aragón, y tamién de os aragoneses.
Pero en primeras no yera
asinas, y os Cronistas de o Reino d'Aragón lo sabeban. Por saber sabeban os
nombres de os cuatro proprietarios de as cabezas coronadas, y claro, sabeban
que dos yeran moros, pero atros dos yera cristianos.
Siempre mos han contau
que a Batalla d'Alcoraz estió entre moros y cristianos, y que a Cruz ye en
honor de San Chorche, que aduyó a los cristianos y as cabezas son de os cuatre
reis moros que les ne cortaron (y dale, que no!) en a batalla.
Primero aclarir que en a
Edat Media ixo de cortar-le a cabeza a un mainate enemigo yera mal negozio, no
ye que no pasase nunca, bien o sabemos por Pedro II, pero en iste caso estió
porque o nuestro Rei, en a Batalla de Mureth se cambeó por un caballero pa que
no lo reconoxesen en a baralla y mirasen os franceses de fer-lo preso. En
cuenta d'ixo, lo mataron pensando que no más yera un caballero cualsiquiera.
Porque o millor negozio en a guerra medieval yera fer preso a lo mainate, pa
dimpués demandar diners por a suya libertá. Denguna Coronica diz que denguno de
os cuatro mainates moros d'Alcoraz risultase muerto.
Lo que si dizen as
coronicas son os suyos nombres.
Sabemos que ya Sancho
Ramírez, Rei d'Aragoneses y Pamploneses eba construyiu os castiellos de Lobarre
y Montaragón pa que toz os lugars de moros de o Flumen y a Galliguera les dasen
os suyos treudos y frutos a ellos en cuenta de a o mainate moro de Uesca,
Abd-er-Rahman, que allora pendería cada vegada más de Zaragoza.
Pero Sancho Ramírez murió
en as luitas y esferras, que'n eba a ormino baxo os Muros de Uesca, y o Rei
moro de Zaragoza Al Mustaín, se pensó que sería fázil devantar o Sitio pues os
aragoneses yeran sin o suyo Rei. Al-Mustaín, no yera dengún fato, pues eba
conseguiu ser independién de os Almorávides que dominaban a resta d'Al-Andalus,
pero a coste de ser vasallo de Alfonso VI Rei de Llión, antimás d'Emperador
d'España (Imperator Totius Hispaniae).
Pedro, Rei d'Aragoneses y
Pamploneses, Conde de Pallars y Siñor de os Condes de Bearn, Bigorra y Foix,
antimás de parient de o Conde d'Urgell y o Duque d'Aquitania, teneba un
exerzito bien parau con chen avezada en a guerra, que mesmo eba estau en
Cherusalem y con muitos caballers. Y no yera vasallo de o Emperador d'España,
pues lo yera de o Papa de Roma, dende o tiempo de Sancho Ramírez.
Asabelos de caballers
estaban con o Rei Pedro d'Aragón. A caballería pesada yera un arma nueva,
surtida de o feudalismo, muito desarrollau a o norte de os Pirineus, pues cada
caballero eba de tener muitos vasallos libres que le pagasen buenos diners pa
poder tener varios caballos grans y poder vestir-se tot de fierro. En Al
Andalus no bi eba, yera una soziedat urbana, en a que os labradors yeran
esclavos y ande no daba pa tanto, pero Al Mustaín yera vasallo de Alfonso VI de
Llión, asinas que le demadó aduya, y iste le nimbió dos siñors riojanos con os
suyos caballers, que mirarían d'equilibrar as fuerzas. O Conde García Ordóñez
de Nájera y o Señor Gonzalo Núñez de Lara.
Qué le deziba la
Diputazión a o Rei con iste escudo, pues.
Os aragoneses yeran en
ixe tiempo chen argüellosa, que sabeba d'ande veniba y qui yera, encara que Aragón
estase en crisis y ya no tenese a fueza d'antismás, se permitiban remerar con
os suyos simbolos que representaban a un Reino, un Estau sobirano, que meteba
as suyas leis per denzima de o suyo rei, que eba estau cabeza d'una Corona
asabelo gran, mesmo que no olvidaba que, en años, tenioron que luitar contra os
castellanos pa construir o país.
Y por si a belún le
parixeba razista lo de as cuatre cabezas de moros, no cal olvidar que tienen
nombre: Al Mustaín, Abd-her-Rahman, García Ordóñez y Gonzalo Nuñez, y que no
sería denguna barbaridat tornar a meter dos moros y dos cristianos en a Cruz
d'Alcoraz de o nuestro Escudo.
Comentarios
Publicar un comentario